ரேஷன் கடை சேல்ஸ்மேன் பணிக்கு விண்ணப்பிக்கலாம்

திருவண்ணாமலை மாவட்டத்தில் ரேஷன் கடைகளில் 120 சேல்ஸ்மேன்களை நியமிக்கும் அறிவிப்பு வெளியீடப்பட்டுள்ளது. அதில் கொரோனா நேரத்தில் ஆல்பாஸ் ஆனவர்களுக்கு செக் வைக்கப்பட்டுள்ளது. 

திருவண்ணாமலை மாவட்டத்தில் ரேஷன் கடைகளில் 120 சேல்ஸ்மேன் காலி பணியிடங்கள் நிரப்பும் அறிவிப்பு வெளியிடப்பட்டுள்ளது. அதன்படி தொடக்க வேளாண்மை கூட்டுறவு கடன் சங்கத்திற்கு உட்பட்ட ரேஷன் கடைகளில் 119 பணியிடங்களும், வேளாண்மை உற்பத்தியாளர்கள் கூட்டுறவு விற்பனைச் சங்கத்திற்கு உட்பட்ட ரேஷன் கடைகளில் 1 பணியிடமும் நிரப்பப்பட உள்ளது.

இந்த பணியிடங்களுக்கு தொகுப்பு ஊதியமாக ஓராண்டு வரை ரூ.6250-ம், ஓராண்டுக்குப் பிறகு ரூ.8600-ரூ.29000 என ஊதிய விகிதம் இருக்கும்.

சேல்ஸ்மேன் பணியிடங்கள், எந்தெந்த பகுதிகளில் எவ்வளவு காலியிடம் உள்ளது என்பது வெளிப்படையாக அறிவிக்கப்படவில்லை.

இந்த காலிப்பணியிடங்கள் அனைத்தும் (Estimated Vacancy) தற்காலிகமானது, (Tentative) மற்றும் மாற்றத்திற்கு உட்பட்டது என அறிவிக்கப்பட்டுள்ளது.

இது சம்மந்தமாக திருவண்ணாமலை மாவட்ட ஆள்சேர்ப்பு நிலையத்தின் தலைவர் மற்றும் இணைப்பதிவாளர் தெரிவித்திருப்பதாவது,

362 சேல்ஸ்மேன் பணியிடத்திற்கு பொது பிரிவினருக்கு 38 இடங்களும், பிற்படுத்தப்பட்டோருக்கு 32ம், பிற்படுத்தப்பட்டோர் இஸ்லாமியர்களுக்கு 4ம், மிகவும் பிற்படுத்தப்பட்டோர், சீர்மரபினருக்கு 24ம், ஆதிதிராவிடர்களுக்கு 16 மற்றும் பேக்லாக் காலியிடம் 1, ஆதிதிராவிடர் அருந்ததியினருக்கு 4ம், பழங்குடியினருக்கு 1ம் ஒதுக்கீடு செய்யப்பட்டுள்ளது. 

விண்ணப்பதாரர்கள் 01.07.2024-அன்று 18 வயது பூர்த்தி அடைந்தவராக இருக்க வேண்டும். ஆதிதிராவிடர், அருந்ததியர், பழங்குடியினர், மிகவும் பிற்படுத்தப்பட்ட வகுப்பினர், சீர்மரபினர், பிற்படுத்தப்பட்ட வகுப்பினர், பிற்படுத்தப்பட்ட வகுப்பினர் (முஸ்லீம்) மற்றும் இவ்வகுப்புகளைச் சார்ந்த முன்னாள் ராணுவத்தினர், மாற்றுத் திறனாளிகள் மற்றும் அனைத்து இனத்தைச் சார்ந்த ஆதரவற்ற விதவைகளுக்கு உச்ச வயது வரம்பு இல்லை.

இதர வகுப்பினர் (OC) - 32 வயது. இதர வகுப்பினைச் சார்ந்த முன்னாள் ராணுவத்தினர் - 50 வயது. இதர வகுப்பினைச் சார்ந்த மாற்றுத் திறனாளிகள் - 42 வயது.

கல்வித் தகுதிகள்:-

மேல்நிலை வகுப்பு (பிளஸ் 2 தேர்ச்சி) (அல்லது) அதற்கு இணையான கல்வி தகுதி தேர்ச்சி

விண்ணப்பிக்கும் முறை:-

அறிவிக்கப்பட்டுள்ள காலிப்பணியிடங்களுக்கான விண்ணப்பம் http://drbtvmalai.net என்ற இணையதளத்தில் ஆன்லைன் மூலம் மட்டுமே பதிவேற்றம் செய்யப்பட வேண்டும். நேரிலோ அல்லது தபாலிலோ பெறப்படும் விண்ணப்பங்கள் எந்தவித முன்னறிவிப்புமின்றி நிராகரிக்கப்படும்.

நேர்முகத் தேர்வில் கலந்து கொள்வதற்காக அழைக்கப்படவுள்ள நபர்களின் பெயர் பட்டியல் திருவண்ணாமலை மாவட்ட ஆள்சேர்ப்பு நிலையத்தின் இணையதளம் வழியாக வெளியிடப்படும்.

நேர்முகத் தேர்வு நடைபெறுவது தொடர்பான விவரங்கள் மின்னஞ்சல் (E-Mail), குறுஞ்செய்தி (SMS) மூலம் விண்ணப்பதாரர்களுக்கு அனுப்பி வைக்கப்படும். நேர்முகத் தேர்வு நடைபெறும் இடம், நாள், நேரம் ஆகிய விவரங்கள் அடங்கிய நேர்முகத் தேர்விற்கான அழைப்புக் கடிதங்களை, விண்ணப்பதாரர்கள் இணையதளம் மூலம் பதிவிறக்கம் செய்து கொள்ள வேண்டும்.

விண்ணப்பிக்கும் முறை குறித்து எழும் சந்தேகங்களுக்கு விண்ணப்பதாரர்கள் drbtvm2022@gmail.com என்ற இ-மெயில் மூலம் திருவண்ணாமலை மாவட்ட ஆள்சேர்ப்பு நிலையத்தின் மின்னஞ்சல் முகவரியில் அலுவலக வேலை நேரங்களில் தொடர்பு கொள்ளலாம்.

உதவி மையம் தொடர்பு தொலைப்பேசி எண்: 04175-298343

விண்ணப்பதாரர்கள் தெரிவுக்கு விண்ணப்பிப்பதற்காக கொடுக்கப்பட்டுள்ள கடைசி நாள் வரை காத்திருக்காமல் அதற்கு முன்னரே போதிய கால அவகாசத்தில் விண்ணப்பிக்குமாறு அறிவுறுத்தப்படுகிறார்கள். ஏனெனில் அதிகப்படியான விண்ணப்பதாரர்கள் விண்ணப்பிக்க நேரும் போது, விண்ணப்பத்தைப் பதிவேற்றம் செய்வதில் தாமதமோ அல்லது தொழில் நுட்பச் சிக்கல்களோ எழ வாய்ப்புள்ளது. 

மேற்கூறிய தொழில்நுட்பக் காரணங்களால் அல்லது வேறு காரணங்களால், விண்ணப்பதாரர்கள் தங்களது விண்ணப்பங்களைக் கடைசிக் கட்ட நாட்களில் சமர்ப்பிக்க இயலாது போனால் அதற்கு மாவட்ட ஆள்சேர்ப்பு நிலையம் பொறுப்பாகாது.

ஆன்லைன் விண்ணப்பங்களை சமர்ப்பிப்பதற்கான இறுதி நாள் 07.11.2024. நேரம் மாலை 05.45 மணி.

2020-2021-ஆம் கல்வி ஆண்டில் பத்தாம் வகுப்பில் மதிப்பெண் குறிப்பிடப்படாமல் ஒவ்வொரு பாடத்திற்கும் எதிராக மதிப்பெண் குறிப்பிடாமல் வெறும்  PASS என்று குறிப்பிட்டு வழங்கப்பட்ட மதிப்பெண் சான்றிதழை கொண்டுள்ள விண்ணப்பதாரர்கள் தாங்கள் படித்த பள்ளியில் 9-ஆம் வகுப்பு மதிப்பெண் சான்றிதழினை அந்தத் தலைமை ஆசிரியரின் சான்றொப்பம் பெற்று (மொத்த மதிப்பெண்கள், பெற்ற மதிப்பெண்கள் ஆகியவற்றை குறிப்பிட்டு) அதனை, 10-ஆம் வகுப்பு PASS என்று வழங்கப்பட்ட மதிப்பெண் சான்றிதழுடன் பதிவேற்றம் செய்ய வேண்டும். 

இத்தகைய நேர்வுகளில் 9-ஆம் வகுப்பு மதிப்பெண் சான்றிதழினையும் இணைக்காத விண்ணப்பங்கள் நிராகரிக்கப்படும் என்பதை அறியவும். இத்தகைய நேர்வுகளில் 10-ஆம் வகுப்புக்கு பதிலாக விண்ணப்பதாரர்களின் 9-ஆம் வகுப்பில் பெற்ற மதிப்பெண்களின் அடிப்படையில் மட்டுமே உரிய மதிப்பு வழங்கப்படும்.

இவ்வாறு ஆள்சேர்ப்பு நிலையத்தின் தலைவர் மற்றும் இணைப்பதிவாளர் தெரிவித்துள்ளார்.

2020-21ம் ஆண்டுகளில் கொரோனா தொற்று காரணமாக 10ம் வகுப்பு மாணவர்கள் தேர்வு எழுதாமல் தேர்ச்சி பெற்றது குறிப்பிடத்தக்கது. இதன் காரணமாகவே 9-ஆம் வகுப்பு மதிப்பெண் சான்றிதழ் அடிப்படையில் உரிய மதிப்பு வழங்கப்படும் என தெரிவிக்கப்பட்டுள்ளது.